To be her ain true lover. They shaped him in her arms at last A mother-naked man, She cuist her mantle over him, And sae her true love wan. Up then spake the Queen o' Fairies, Out of a bush o' broom: "She that has borrowed young Tamlane, Has gotten a stately groom!" Up then spake the Queen o' Fairies, Out of a bush of rye: "She's ta'en away the bonniest knight In a' my companie! "But had I kenned, Tamlane," she says, "A lady wad borrow thee, I wad hae ta'en out thy twa gray e'en, Put in twa e'en o' tree! "Had I but kenned, Tamlane," she says, "Before ye came frae hame, I wad hae ta'en out your heart of flesh, Put in a heart o' stane! "Had I but had the wit yestreen That I hae coft this day, I'd hae paid my teind seven times to hell, Ere you'd been won away!" * * * * * TRUE THOMAS. True Thomas lay on Huntlie bank; A ferlie he spied with his e'e; And there he saw a ladye bright, Come riding down by the Eildon tree. Her skirt was o' the grass-green silk, Her mantle o' the velvet fine, At ilka tett of her horse's mane, Hung fifty siller bells and nine. True Thomas he pu'd aff his cap, And louted low down to his knee; "All hail, thou mighty Queen of Heaven! For thy peer on earth I never did see."